Sa interview sa DXDC RMN Davao kang PLtCol. Florante Retes, Officer-in-Charge sa Digos City Police Station, iyang giila ang mga nalambigit sa disgrasya nga mao sila Kyro Alipin, 17 anyos (driver sa Honda TMX), taga Babalan, Digos City; Samuel Balo, 23 anyos (driver sa Honda motorcycle) nga taga Barangay San Jose, Digos City; ug Rodney Milliones, 18 anyos (driver sa SkyGo motorcycle) ug angkas niini si Kevin Maloloy-on, pulos residente sa Barangay San Miguel, Digos City.
Sa imbestigasyon, padulong sa southbound area ang motor nga gimaneho nila Alipin ug Balo ug pag-abot sa nahisgutang lugar, kalit na lamang nga miabot sa ilang lane ang kasugat nga motor nga gimaneho ni Milliones, himungdan nga nagkarambola ang mga sakyanan, tungod usab sa ilang kusog nga dagan.
“Kanang nagpakusog-kusog (sila) og patingog sa ilahang mga motor kay sugat sa Christmas. Unya, nag-head on collision ang motor nga duha ug kasugat nila nga isa (pa ka motor),” saysay sa pulis.
Tungod sa impact, gideklarang dead on arrival ang mga driver sa motor nga sila Alipin ug Milliones lakip na ang angkas niini nga si Maloloy-on samtang padayong gitambalan sa ospital ang laing driver sa motor nga si Balo.
Pahimangno sa otoridad nga likayan ang pagpakusog og dagan aron malikayan ang aksidente sa dalan.
RadyoMaN Kirby Manzon
