Pilason ang tatlo ka mga mekaniko, matapos nga tiruhon sa Purok 1, Brgy Lapu, Polomolok, South Cotabato, pasado ala-1:50 sang hapon , kahapon nga adlaw, Hulyo 11, 2021.
Ginkilala ang mga biktima kanday Udsad Mambatawan Cossain , 55 – anyos, Jerome Subrera Retuta, 29 -anyos kag Peter Kikan Espada , 41 –anyos, pareho residente sang Purok 1, Brgy Lapu, Polomolok.
Sa imbestigasyon sang Polomolok MPS, samtang nagakay-o ang mga biktima sang isa ka unit sang Nissan Pick-up, nagpalapit ang isa ka suspek kag gintiro ang mga biktima sang makapila ka bes gamit ang long firearm.
Gilayon naman nga nagpalagyo ang suspek sakay sa sport type motorcycle upod ang duha ka mga kaupdanan padulong sa Brgy. Bentung sa nasambit nga banwa.
Nakaangkon sang pilas sa mga nagkalain-lain nga parte sang ila nga lawas ang mga biktima nga gilayon naman nga gindala sa ospital sa banwa, apang ginbalhin man sa isa ka ospital dire sa syudad sang Koronadal.
Nakuha naman sa crime scene ang 12 ka fired cartridge cases sang ginaaligar 5.56 MM nga ginsubmitir naman sa South Cotabato Provincial Crime Laboratory Office (PCLO) para sa ballistic kag cross matching examination.
Sa subong nagapadayon ang imbestigasyon sang Polomolok MPS sa insidente.
