BAGO CITY, NEGROS OCCIDENTAL – Nagtuga sang menor nga kasamaran sa 3 ka mga pasahero kag driver ang natabo nga pagbungguanay sang duha ka mga salakyan sini nga kaagahon sa Brgy. Taloc, Bago City.
Ang insidente pasado las 5 sini nga kaagahon sa Highway sang Brgy. Taloc sa amo nga ciudad kon diin involved diri ang isa ka Canter truck kag Roadstar nga pampasahero nga mini bus.
Suno sa imbestigasyon ang Canter nga gina-maneho ni Emmanuel Diogenes, 48 anyos ang edad, residente sang Brgy.Handumanan ang naghalin sa Norte kag magapadulong kuntani sa sur agud magkuha sang 45-days nga manok sa isa ka poultry farm.
Apang sa pagliko sang Canter sa right side sang dalan, nabungguan ini sang Roadstar nga gina-maneho naman ni Johnny Tinamisan, 33 anyos ang edad, tumandok sang Lanao del Norte.
Nag-angkon ang menor nga pilas ang driver sang pampasahero nga salakyan lakip na ang iya 3 ka mga pasahero nga sanday Joey Patua, 28, pumuluyo sang Brgy. Ma-ao, Rolyn Jean Tanio, 21 sang Bago City kag Lynnaine Rodriguez, 60 anyos sang Brgy. Sum-ag, ciudad sang Bacolod./dyHB BACOLOD
