Davao City- Gipalawman sa PNP ang imbestigasyon sa alegasyong pagpugos og pa ‘oral sex’ ug pagpangulata sa usa ka LGBT member nga nahitabo sa may Uyanguren ning syudad sa Davao.
Segun ni Davao City Police Office (DCPO) spokesperson Police Captain Rosario Aguilar, gisubay na sa mga awtoridad ang maong insidente aron maila ang tulo ka wala pa mailang mga suspetsado lakip na usa ka gwardiya.
Matud ni Aguilar, nangalap ang kapulisan og mga witness sa pagkakaron.
“Gipaadtuan na pod nato og pulis sa area kung asa iyahang nahisgot aron masuta kung katong higayuna nga naay nakakita o naay namatikdan ang mga by standers sa pagkakaron nagsubay ba ang Sta. Ana Police Station sa posibleng nihimo ato sa iyaha,” sumala niini.
Samtang, nagpamedikal na ang 23 anyos nga call center agent nga biktima nga si alyas Yan kinsa eksklusibong naabtan sa DXDC nga nagpa-blotter ug nagpatabang sa kapulisan.
Gisaysay sa biktima nga nagbaktas siya duol sa usa ka bangko bandang alas 4 sa kadlawan sa may Uyanguren gikan sa iyahang gitrabahuan nga call center dihang gihagit kini og oral sex sa tulo ka mga suspetsado.
Gisaysay sa biktima, nga giingong gipugos siya nga ipahimo ang sexual act ug gikulata sa mga suspek.
Nakahigayon kini nga makadagan ug nakapangayo og tabang.
Sumala sa biktima nga gikuha ang iyahang bag nga adunay sulod nga pitaka, cellphone ug mga government IDs.
Kasong physical injury ug robbery ang posibleng iduso nga kaso batok sa mga suspek.
RadyoMaN Aimee Guinita
