Pagadian City – Personal nga bangi ang gisundan nga motibo sa kapulisan sa syudad sa Pagadian sa nahitabong pagpangluba alas 8:45 sa gabii niadtong sabado didtong dapita sa Vivian Kiap residence sakop sa Purok Madanihon, Bulatok, Pagadian City.
Giila ang biktima nga si Jarmin Aplasin, empleyado sa mister donut, 30-anyos, residente sa Purok Madanihon, Bulatok, ning syudad.
Patay ang biktima dihang giluba sa suspek nga si Khomenie Rasuman , residente Purok Madanihon, Bulatok, Pagadian City.
Sa inisyal nga imbestigasyon nasayran nga samtang naligo ang biktima sa gawas nga bahin sa iyang gi-rentahan nga boarding house kalit nga niabot ang suspek og giluba ang biktima gamit ang kutsilyo sa makadaghan nga higayon nga miresulta sa hinanali niini nga kamatayon.
Sa eksaminasyon City Health Office nasuta nga nakahi-agum sa walo ka samad nilubaan diin nasayran nga dunay gitas-on sa 13 ka-inches nga kusilyo ang gigamit sa nisibat nga suspetsado.
