Pagadian City—-Gikalipay sa mga molupyo sa Barangay Santa Maria ning siyudad ang nahimong gitanyag nga libreng pagkaon nga gidalit sa pamilyang Marasigan alas 8 ang takna sa buntag niadtong Dominggo.
Kapin 300 ka mga kabataan apil ang pipila ka mga ginikanan ang nalipay sa gidala ni Atty. DM Marasigan uban sa iyang asawa, inahan nga si madam Dodie ug mga anak nga gikan pa sa kaulohan.
Sumala pa ni Atty. DM nga matag tuig nilang ginahimo ang pagpakaon sa mga kabataan nga moabot ngadto sa 300 ka buok Dungan sa adlaw’ng natawhan sa ilang amahan nga si Sir Domingo Marasigan nga usa na karon ka masakiton apan sila nagpasalamat tungod mitungtong kini sa 90 anyos.
Gawas sa pagkaon nga gihatag ngadto sa mga kabataan, ang pamilyang Marasigan nanghatag sab og mga dulaan, isip regalo duyog sab sa pahalipay nga gitunol sab sa mga sakop sa RMN-DXPR Pagadian uban ang RMN Foundation, ang maong aktibidad ika unom na ka tuig nga ginahimo sa pamilyang Marasigan. (Mel Coronel/ dxpr News Team)
