Pagadian City – Nagpaalim karon sa ospital ang biktima sa nahitabong pagpamusil alas 9:20 kagabie sa Purok Adelfa, Alano Street, Barangay San Jose, Pagadian City, Zamboanga del Sur.
Ang biktima giila sa kapulisan nga si Alona, 34 anyos, minyo ug residente sa Purok Adelfa, Barangay San Jose, Pagadian City. Gipusil ang biktima sa wala mailhing mga suspetsado gamit ang calibre 45 nga pistola basi na usab sa lima ka mga basiyo sa bala nga narekober sa dapit nahitabuan.
Sa imbestigasyon nga gipahigayon nasayran nga sa wala pa ang naasoyng pagpamusil, ang biktima ang naglingkod sa bangko sa iyang tugkaran sa iya mismong panimalay sa dihang miduol kaniya ang suspetsado nga nagsuot ug pula nga t-shirt ug nagbonnet ug sa walay igong hinungdan mipusil sa biktima sa makadaghang higayon.
Ang biktima nakaangkon ug samad pinusilan sa nagkadaiyang parte sa kalawasan ug daling gidala sa Mendero Hospital, Pagadian City arun katambalan, samtang ang suspetsado ang daling miikyas paingon sa Barangay Sta. Maria ning syudad sakay sa iyang single motor Honda XRM ug walay plate number.
Padayun pang nagpahigayon ug makuting imbestigasyon ang kapulisan ning syudad alang sa posibleng pag-ila ug pagdakop sa suspetsado.
