Kumalarang, Zamboanga del Sur – Gumikan sa gibali nga sigarilyo nisangko sa pagpangluba ang sadya unta nga panagtagay sa ilimnon nga makahubog sa duha managhigala didto sa Barangay Boyugan West, Kumalarang Zamboanga del Sur niadtong sabado sa hapon.
Gitambalan karon sa ospital ang biktima nga Crisanto Montejon Copio, 35-anyos, samtang padayon usab nga gipangita sa kapulisan ang suspek nga si Jeffrey Monlan Sigba, 28-anyos, pulos residente sa Purok 8, Boyugan West, Kumalarang niining probinsya.
Sa inisyal nga imbestigasyon sa Kumalarang PNP, nasayran nga samtang nag-inom ang biktima ug ang suspek nahitabo ang kagubot dihang nangayo og sigarilyo ang biktima ngadto sa suspek ug dihang gitunulan og usa ka stick nainsulto ang suspek kay gibali man kini sa biktima.
Gumikan sa kaputong sa suspek largo kining nihulbot sa iyang kutsilyo ug diretso nga gihansak ngadto sa nagkadaiyang bahin sa lawas sa biktima.
Human sa panghitabo dali nga nisibat ang suspek paingon sa sagbutan ug sunaop nga bahin sa ilang dapit.
Giatiman pa sa mga doktor sa St. John General Hospital, Buug, Zamboanga Sibugay biktima.
