Ginabulubanta 37 mil ka mga empleyado ang maapektuhan sa tion nga siraduhon ang Boracay .
Suno kay Mr. Jonathan Cabrera, former SB Member sang Malay, Aklan , apaektado ang mga negosyante kon wala na sang turista nga magapadulong sa Boracay kag labing makaluluoy ang mga empleyado sa mga transport services, hotels kag resorts pati na ang mga traysikad drivers, mga masahista kag madamo pa.
Dugang pa niya nga indi pa maathag sa tanan kon ano ang guidelines sang nasambit nga closure gani nagalaum sila nga maathagan ang tanan sa pagahiwaton nga inter agency meeting sa maabot nga Abril 10.
Nagalaum si Cabrera nga bawion gilayon ni Presidente Duterte ang pagpasirado sang Boracay bangud nagabuligay na ang tanan agud matinluan ang isla kag may mga tikang na sila nga ginahimo agud masolusyunan ang problema sa solid waste sa isla.
Madumduman nga sang damlag lang, ginkumpirmar ni presidential spokesperson Harry Roque nga gin-aprobahan na ni Presidente Rodrigo Duterte ang pagpasirado sang Boracay epektibo Abril 26, 2018
(photo from web)
