Davao City – Sayo pa karon aron makasulti kita nga dili pa igo ang pagsulod sa ikatulong telecommunication company alang sa sufisyente ug maayo nga serbisyo ilabi na diha sa speed internet alang sa mga subscribers sa tibuok nasud.
Matud ni Mandaya Hotel Manager Benjamin Banzon Jr., usa ang hotel industry sa daghang sa mga subscribers sa nasud nga labing apektado sa dili maayo nga serbisyo sa duha ka giant telcos karon.
Apan ang importante alang sa mga operators sa mga industriya sama sa hotel industry mao ang benepisyo sa pagsulod dinhi sa Pilipinas sa ikatulong telco nga Mislatel nga usa ka consortium sa Undenna ug China Telecom.
Gilauman nga ang pag-entra sa Mislatel sa nasud maghatag og katumanan sa damgo sa mga subscribers nga makaangkon sila og paspas nga internet nga wala mahatag sa nahaunang duha ka giant telcos.
Matud ni Banzon, usa ang hotel industry sa daghang sa mga subscribers sa nasud ang labing apektado sa pangit nga serbisyo sa duha ka giant telcos.
Gani, maundang ang operasyon sa mga hotels sama sa Mandaya kung muhinay ang speed sa internet nga dakung epekto sa booking sa ilang mga customers.
Apan karon nga gitugotan sa gobyernong makasulod ang laing telco, ang publiko makapili na unya sa gusto nilang internet service providers nga nagtanyag og mas maayo nga serbisyo.
Dugang ni Banzon, dili pagpaginansiya ang tumong sa Mislatel sa pag-entra sa negosyo sa telecommunications kon dili, ang paghatud og maayo nga serbisyo sa internet ngadto sa mga subscribers labaw sa tanan.
RadyoMaN Joel Viray
