Tabina, Zamboanga del Sur – Patay nang napalgan ang 4 anyos nga batang lalaki human kining gitoohang nalumos alas 8:15 kagabii didtong dapita sa Purok Bayanihan, Brgy. Poblacion, Tabina, Zamboanga del Sur.
Giila sa niresponde nga kapulisan ang biktima nga Simplice Louise Babao, residente sa nahisgutan nga lugar.
Sa inisyal nga imbestigasyon nasayran nga gibilin lang sa balay iyang apohan ang maong bata kay bulag man ang ginikanan niini, busa gipakostudiya kini sa iyang apohan apan niadtong panahona nag-inusara ang biktima sa pinuy-anan og gibyaan samtang natulog sa balay.
Nasayran sa RMN DXPR Newsteam gikan sa mga silingan sa biktima, nga ang bata normal nga nimata, nibangon og nikaon sa balay sa iyang iyaan apan human niadto wala na nakita sa lugar ang biktima .
Naalarma ang mga apohan ug mga silingan rason nga ila kining gipangita apan nakugang nalang sila dihang nakit-ang nagnlutaw nga wala nay kinabuhi ang biktima sa fishpond nga nahimutang sa maong dapit.
Nagtoo ang imbestigador sa PNP Tabina nga si SPO1 Nimrod Baja nga nagdula sa lugar ang biktima apan aksidente nga nadigyas ug wala na makabalik hangtod nga nalumos.
