Dimataling, Zamboanga del Sur – Nadala sa balay tambalanan ang usa ka 4 anyos nga batang lalaki human kini aksidenteng nabanggaan ug dump truck nga gipanag-iyahan sa LGU Dimataling alas 2:30 sa hapon kagahapong adlawa didto sa Purok 7, Barangay Kagawasan, lungsod Dimataling,ning probinsya.
Personal nga miduol sa buhatan sa kapulisan kagahapong adlawa ang driver nga nailang si Alex Legarte Calacat, 42 anyos ug residente sa Purok 2, Barangay Kagawasan, Dimataling arun sa pagsaysay sa panghitabo.
Gibutyag sa driver nga samtang nagmaneho siya sa dump truck paingon unta sa Sitio Quarry, Barangay Kagawasan, Dimataling, sa kalit mitabok ang 4 anyos nga batang lalaki nga nailang si PRINCE KYLE RESTAURO RUBIO kinsa residente sa Purok 7, Barangay Kagawasan, Dimataling hinungdan nga nabanggaan kini.
Ang biktima ang nakaangkon ug mga samad sa iyang kalawasan ug daling gidala ngadto sa Dimataling Municipal Health Center arun katambalan apan pipila ka mga oras gibalhin kini ngadto sa Zamboanga del Sur Medical Center, Barangay Dao, Pagadian City alang sa dugang medikasyon.
Ang driver lakip na ang dumptruck nga nakarehisto ilalum sa pangalan sa LGU Dimataling ug ni Mayor Haniel Baya ang gikustodiya na sa Dimataling MPS alang sa tukmang disposisyon.
