Davao City – Dako ang posibilidad nga gibinuangan og bitay-bitay ang 4 anyos nga batang lalaki kinsa nakaplagang wala nay kinabuhi human giingong gi-torture sa may sapa sa Matanao, Davao del Sur.
Sa pakighinabi sa DXDC News team sa imbestigador sa maong kaso sa Matanao Police Station nga si PO2 Ronelyn Gomez, posibleng usa ka ra ka tawo ug adunay deperensya sa pangutok ang mibuhat sa maong krimen bandang ala 2:30 sa hapon kagahapong adlawa, Hulyo 24 sa Sitio Botilon, Brgy. Cabasagan, Matanao, Davao del Sur.
Dugang ni Gomez nga padayon ang ilang ginahimong imbestigasyon aron madakpan ang suspek sa pagpatay sa batang si alyas Oyo diin sa karon aduna na silay person of interest.
Samtang giklaro usab sa pulis nga wala gi-torture ang kinatawo sa batang lalaki ug gituohang tungod sa paghigot gamit ang dahon sa saging ang gikamatay niini.
Nakahiagom usab og samad sa agtang ang biktima kinsa gituohang naigo sa bato sa paghagba niini gikan sa pagbitay.
Subay niini, nanawagan ang kapulisan ngadto sa mga posibleng nakakita sa maong insidente nga mupatim-aw sa ilang buhatan aron makahatag og impormasyon alang usab sa hustisya sa kamatayon sa 4 anyos nga bata.
RadyoMaN Renz Barbarona
