Sa exclusive interview sa DXDC RMN Davao kang Jessica Duhilag, inahan sa batang si Kentoy, iyahang gisaysay nga hapon niadtong adlawa sa dihang nahibal-an nalang niini nga gianod na ang iyahang anak sa kusog nga bul-og sa tubig sa kanal duol sa ilahang balay, tungod sab sa kusog nga ulan niadtong higayona.
“Naa ko sa kusina then siya nananghid sya nga muadto sa iyang ig-agaw. Akong tigutan kay muadto siya sa iyang ig-agaw. Mao gyud na iyang routine. Nagdula ra yata sya. (Posible) nga napalid iyang payong or iyahang tsinelas naanod unya iyang giapas,” saysay ni Duhilag.
Gilayon usab nga mihimo ug search and rescue operation ang Maragusan Municipal Disaster Risk Reduction and Management Office (MDRRMO) ug sa pagpadayon sa pagpangita, nakaplagan ang bata nga wala nay kinabuhi sa Salaysayon River Maragusan, pasado alas 12:00 sa udto kagahapon, June 7, 2024.
Matud sa inahan nga aksidente gayud ang nahitabo ug walay foul play matud sa otoridad. Wala usab siya gipasagdan sa lokal nga panggamhanan aron mapahilona ang iyahang anak samtang sila nagsubo sa nahitabo.
RadyoMaN Kirby Manzon
