Davao City – Sikop ang upat ka mga wanted persons atol sa gilusad nga LOI: Manhunt Charlie sa kapulisan sa Davao del Norte gahapong adlawa.
Mga dinakpan mao sila si Giovanne Agrade Ybanez alyas “Yokyok,” 34 anyos nga taga Prk. Limonsito, Brgy New Visayas, Panabo City, Davao del Norte alang sa kasong Mulitple Attempted Murder; Johnric Abadiano Zamora, 27 anyos, minyo, residente sa Prk. 6, Brgy. Pantaron, Sto. Tomas, Davao del Norte ug Vanessa Amor Valleser Zamora, 23 anyos nga taga Prk. 6, Brgy. Pantaron, Sto. Tomas, Davao del Norte sa kasong Robbery in an Inhabited Place ug Jun Vicente Carbonilla, 34 anyos, nakapuyo sa Block-6 lot -2 St Paul Street, St. Therese Subd, Brgy Apokon, Tagum City Davao Del Norte alang sa kasong Qualified Theft.
Sa kampanya batok loose firearms, arestado si Pablo Elambayo Garanganao, 49 anyos, residente sa Darluz Subdivision, Brgy. Tibal-og, Sto. Tomas, Davao del Norte human kini wala napakita nga mga dokumento sa iyang pistola.
Nakuha sa dinakpan ang usa ka cal. 45 armscor pistol usa ka magazine ug 8 ka bala.
Wala usab nakalusot sa otoridad ang usa ka Arnulfo Villaruben Repaso, 40 anyos nga taga Prk 2 Brgy San Francisco, Panabo City atol sa gilusad nga buy bust operation kuyog ang PDEA. Nakuha sa mga dinakpan ang usa ka sachet sa gituohang shabu ug mag atubang kini og kaosng kalapasan sa RA 9165.
RadyoMaN Abi Bibera
