ZAMBOANGA CITY—Cuatro person ya tambien ya sale arestao na continuacion operacion del pulis contra droga progivido del Martes por la noche.
El cugida con cuatro persona ya sosede na barrio de Cawit banda alas 10:40 del noche.
El portavoz del PRO9 Chief Insp. Helen Galvez ya nombra con el maga arestao como canda Islani Sayadi y Sawad, 39, de Sta. Barbara, Jairulla Barahama y Sahaji, 38, Paki Abdulhalim y Rahamad, 47, ambos de Cawit y si Umman Barahama y Sahaji, 47, de Arena Blanco.
Con el maga suspechao ya aresta el maga pulis del Ayala Police Station na encabesamiento de Sr. Insp. Albert Alfaro pormedio del buy-bust.
Asegun na report, si Umman amo el target del maga pulis donde este mismo el ya bende shabu conel police undercover encavio del marked money.
Mientras su maga comañero talya tambien aquel tiempo na lugar y asegun enbuelto estos na proliferacion del droga prigivido na lugar.
El maga pulis ya recobri durante el operacion amo el maga seguiente; dos diutay paquete y unu regular el grandor ta contene shabu, P200 marked money y cuantos maga cosas ta usa para quema shabu. – Dan Toribio
