Sa pakighinabi sa DXDC RMN Davao kang Police Lieutenant Colonel Jeffrey Latayada, ang Chief of Police sa Tagum City Police Station, iyang giila ang suspect nga mao si Don Manungas kinsa naa na karon sa ilang kostudiya.
Sa interview usab sa DXDC kang Cherith Grace Aurelio, ang anak sa mga biktima, iyang gisaysay nga ang iyang inahan ang legal administrator sa property nga ilang gibisita.
Samtang gipahinloan ang balay tungod dugay na kining abandonado, miabot og kalit si Manungas og gi-claim nga sila pa ang tag-iya sa maong property ug nagmaoy hinungdan nga gisumbag niya ang mga senior citizens nga sila Carlos Parreño ug Florencia Parreño pasado alas 3 sa hapon niadtong February 12, 2024.
Dugang butyag ni Aurelio nga unang gisumbag ang iyang bana apan nasagang niini ug sa dihang nakita ang iyang inahan, miduol ang lalaki ug gisumbag si Parreño sa mata ug gikwelyuhan pa.
Wala kaagwanta, misuway pa si Manungas og kuha’g bakal ug didto na sila naalarma nga mutawag na og police.
“Akong mama ang grabe ang injury kay iyang mata man gud ang gisumbag, naa siyay scratch sa iyang collar bone. So mao to naga-recover pami sa trauma. Nangayo siyag pasaylo pero ang giingon sa akong parents is i-agi nato sa legal nga process,” pamahayag ni Aurelio.
Sa pagkakaron, pamasalamaton sila sa tanang mitabang kanila nga makuha ang hustisya ug kaangayan alang sa ilang pamilya.
RadyoMaN Ivy Parido
