4 ka mga lalaki, napalgang patay sa Davao de Oro sa susamang adlaw

Davao City – Walay kabutangan ang kabalaka sa mga residente sa Davao de Oro human napalgan ang patay’ng lawas sa upat ka mga lalaki sa probinsya nga oras ra ang ligas, gahapon, May 13, 2024.

Sa interview sa DXDC RMN Davao sa Maco Municipal Police Station, giila ang duha ka mga biktimang napalgang patay sa Prk. 1 Barangay Panibasan, Maco pasado alas 9 gahapon nga mao sila Joseph Cosal ug Aldrin Dagsangan nga parehong residente sa Mabini.

Samtang sa pakighinabi sab sa DXDC ngadto sa mga personahe sa Pantukan MPS, giila ang lalaking napalgang patay sa Purok 1, Bitoon, Barangay Tagdangua, Pantukan Davao de Oro pasado alas 6 sa buntag gahapon nga mao si Rey Quidato ug laing patay’ng lawas pa ang nakita pagkahapon nga wala pa mailhi sa kapulisan.

Ang upat ka mga indibidwal adunay mga samad pinusilan sa kalawasan ug nahipos sa crime scenes ang pipila ka basiyo sa bala.

Sa pagkakaron, nagpadayon ang pagpangita og witness ingon man ang imbestigasyon sa Davao de Oro Police Provincial Office aron masuta ang motibo sa krimen ug pagsubay sa posibilidad nga basin magkaila ra ang upat ka mga biktima.

RadyoMaN Ivy Parido