4 ka national officials bisita sang Bacolod sa Independence Day kag Charter Commemoration

Bacolod City – Apat ka mga national officials ang inbitado ni Mayor Evelio Leonardia nga magaserbe nga guest of honor kag speaker sa ika-119th nga Philippine Independence Day celebration kag commemoration sang ika- 79th year sang pagpirmahanay sang Charter sang Bacolod City.

Ini sila amu sanday Undersecretary Jesus “JV” Hinlo Jr. sang Department of Interior and Local Government (DILG); Secretary Guiling Mamondiong, director-general sang Technical Education and Skills Development Authority (TESDA); anay senador Alberto Romulo, nga amu naman ang chairman of the board sang Development Bank of the Philippines (DBP); lakip man si Secretary Silvestre Bello III sang Department of Labor and Employment (DOLE).

Si Hinlo, nga isa ka abogado gikan sa Bacolod, ang nagserbe nga guest of honor and speaker opening sang Bacolod History Photo Exhibit sa Bacolod City Government Center (BCGC) Lobby sang June 10.


Ang exhibit, ang nagshowcase sang 50 ka mga litrato kon paano nag-uswag ang Bacolod sa mga dinag-on. Ini ang magalawig pa tubtob sa June 18.

Si Mamondiong amu naman ang guest of honor kag speaker sa 119th Philippine Independence day celebration sa June 12 sa Bacolod Public Plaza.

Ang Independence Day celebration ang paga-umpisahan sang isa ka flag-raising ceremony, wreath-laying ceremony sa Monument of Unknown Soldiers kag pagasundan sang programa.

May parada naman sa hapon, la una gikan sa Lizares-Araneta Streets, maagi sa mga mayor nga dalaonon sang syudad kag magatapos sa Diamond Jubilee Tower sa Bacolod City Public Plaza.

Samtang si Romulo, nga isa man ka adopted son sang Bacolod, amu ang guest of honor kag speaker sa Banwahanon Awards Ceremony sa June 17 sa BCGC Lobby. Ang Banwahanon award isa ka pinakamataas nga award nga ginahatag sang Bacolod City government sa mga Bacolodnon nga naghatag sang kadungganan sa syudad.

Si Bello, sa pihak nga bahin nga anay katapo sang peace panel chief negotiator kag anay Justice secretary, ang guest of honor kag speaker sa Outstanding Taxpayers kag Outstanding Employees Awards Ceremony sa June 18 sa BCGC Lobby. Pagasundan ini sang “Concert at the Park” a Bacolod Public Plaza takan las 6 sang gab-i.

Ang Bacolod City government ang magapatigayon man sang wreath-laying ceremony a June 19 lag 6:30 sang aga sa Rizal Elementary School, may kaangtanan sa kaadlawan sang atun baganihan nga si Dr. Jose Rizal.

Ang mga hilikuton sang syudad humalin June 10 tubtob 19 ang kabahin lang sang selebrasyon sang “Mga Adlaw sang Paghanduraw (June 12 to 20)” santo naman sa City Ordinance No. 616.

TagsL Visayas, Bacolod, negros, Independence day, charter day, parade

Facebook Comments