Mokabat sa 40 ka containers sa mga pagkaon ang na-imbargo sa Regional Mobile Force didto sa Sitio Larapan, Barangay Dominorog, Bukidnon sayo sa buntag kagahapon.
Gibutyag ni Police Regional Office o PRO 10 Spokesman Supt. Surki Sereñas nga nagpahigayon sa pagpatrolya ang mge elemento sa Regional Mobile Force nga gipangulohan ni Senor Inspector Zean Paul Cobil nga nagbasi sa 104th Mobile Company sa dihang ilang nakalot ilawom sa yuta ang maong mga pagkaon.
Lakip sa nakalot sa mga police ang mga bugas, asukar, asin, monggos ug uban pa.
Matud ni Sereñas nga nagtoo silang ang maong mga pagkaon gipanag-iyahan sa New Peoples Army kon NPA.
Gipasabot ni Sereñas nga tungod sa report sa mga sibilyan sa lungsod sa Dominorog, ilang nadiskubre ang maong mga pagkaon.
Ang maong mga pagkaon tua karon sa custody sa Regional Mobile Force Company sa lalawigan sa Bukidnon.
