Pormal na’ng gilunsad niadtong Sabado sa United Nations Human Settlements Programme o mas naila ng UN-Habitat, ang ilang 44.2 million pesos nga livelihood project alang sa mga taga-Marawi City kinsa naapektuhan sa nahitabong giyera batok sa mga terorista niadtong tuig 2017.
Ang maong programa kabahin sa post-conflict shelter rehabilitation nga magtukod og mga balay alang sa mga internally displaced persons o IDPs nga unang gilunsad niadtong nakalabay’ng semana.
Gastuhan sa gobyerno sa Japan, tumong nasangpit nga livelihood project, nga molungtad sulod sa unom ka bulan hangtud sa Marso 2020, ang paghatag og malungtaron nga panginabuhian sa mga taga-Marawi ug molambo pa ang ilang kinabuhi human sa trahedya.
Priority sa maong proyekto ang mga namuyo sa 20 ka mga dapit sa Agus River ug sa Lanao Lake nga dili na makabalik pa sa ilang mga lugar human kini gideklara’ng “no build zone”; nga IDPs gikan sa mga agricultural barangays sa Guimba, Dulay ug Calocan West; ug mga artisan ug mga handloom weavers sa Marawi City.
Sa assessment sa UN-Habitat, ang mga cash-for-works programs ug mga market linkages, paghatag og puhunan ug mga livelihood opportunities alang sa mga kababayen-an, mga edaran ug mga pamilya nga ang asawa o inahan lang ang nagtrabaho alang sa pamilya, maoy gikinahanglan nila karong mga panahona.
Ipatuman ang nasangpit nga proyekto sa duha ka tracks: una, ang Community-Managed Sustainable Livelihood track nga adunay alokasyon nga 14.2 million pesos ug bahinon sa 13 ka mga kooperatiba.
Ug ang ikaduhang track mao ang Citywide Sustainable Livelihood track, nga adunay alokasyon nga 15 million pesos alang sa duha ka mga implpementing partners. (Divina M. Suson
PHOTOS courtesy of UN-Habitat
