Kinatibuk-ang 47 ka mga mag-uuma sa humay gikan sa 6 ka mga barangays sa lungsod sa Manukan, ning lalawigan sa Zamboanga del Norte ang bag-uhay mi-gradwar gikan sa Climate Change Intensive Hands-on-Training for organic rice production through the Rice Intensification Program sa Department of Agrarian Reform (DAR).
Ang mga Participante sa maong unom ka bulan nga training nga dungan nga gihimo mao ang mga agrarian reform beneficiaries sa 6 ka mga barangays sa Manukan nga mao ang: Linay, Dipase, Saluyong, Gupot ug Don Jose Aguirre.
Human sa graduation, ang mga mag-uuma misaad sa pagbiya sa gitawag nga conventional farming diin sila mitoo nga pinaagi sa ilang nahibaw-an gikan sa Climate Change Intensive Hands-on-Training for Organic Rice Production, mamahimo nilang mapauswag ang ilang mga abot.
Ang SRI maoy pamaagi sa pagtanum ug pagpatubo sa humay nga ubos ang gasto apan mopadaghan sa abot nga dili magamit ug agro- chemicals nga nagtumong sa pagpalig-on sa kahibalo sa mga mag-uuma, capacity ug skills pinaagi sa technical information aron pag-improve sa ilang rice cultivation methods.
Si Provincial Agrarian Reform Program Officer II (PARPO) Mohammad Dassan J. Adju mi-awhag sa mga mi-gradwar nga mga mag-uuma sa paggamit sa ilang nahibaw-an gikan sa training ug i-share ang pamaagi sa panguma ngadto sa ubang mga mag-uuma aron mapauswag ang ilang abot.
Si SRI Regional Coordinator Adelberto B. Baniqued sa samang bahin, mipasabot sa ka-importante sa pagtinabangay ug misaad sa maayong abot kung maayo ang pagpatuman sa pamaagi sa pagtanum ug humay.
Ang maong proyekto gipondohan sa Climate Change Partnership Fund ug sa Local Government, ang usab gipatuman sa lungsod sa Labason diin 40 ang mi-gradwar.
-30- (M.L)
