Roxas City, Capiz- Patay ang 49-anyos nga karpentero matapos nga ginlampusan sang bara de kabra sang kaupod sini sa trabaho sa isa ka furniture shop nga nahamtang sa Brgy Tanza, syudad sang Roxas mga alas 8:00 ang takna kagab-i. Dead on arrival sang gindangat sa ospital ang biktima nga ginkilala kay Rolly Garate sang Andrada Subdivision, Brgy. Banica, Roxas City matapos nga nag-angkon sang patal nga pilas sa iya ulo kag iban pa nga bahin sang lawas.
Sa imbestigasyon sang mga kapulisan, nagbalos ang suspek nga si Virgilio Reyes y Vega sang Brgy. Matinabus, Sigma, Capiz matapos ginluthang sang biktima gamit ang 12 gauge shot gun apang wala ini maigo. Nakita ni Reyes nga magakarga liwat sang bala sang iya armas si Garate, kabangdanan nga wala na sini ginhulat nga makatiro pa liwat. Ginkuha sang suspek ang bara de kabra kag ginlampusan ang biktima.
Sa exclusive interview sang DYVR RMN Roxas, ginpahayag ni Virgilio Reyes nga pasado alas 8:00 kagab-i samtang siya ang may gina-tapos nga furniture sang nagsulod sa shop ang hubog nga biktima kag ginluthang ini gamit ang 12 gauge shot gun apang maswerte nga wala maigo.
Bangud nga luyag protektahan ang iya kaugalingon, nakit-an sini ang isa ka bara de kabra nga yara sa kilid rason nga ginkuha sini kag ginbakbak sa biktima.
Suno kay Reyes, masobra na sa duha ka tuig ang indi nila pag-hangpanay sang biktima matapos nga siya ang ginpasibangdan nga nagkuha sang gamit sa pag-obra sang furniture nga ginapanag-iyahan ni Rolly Garate. Posible suno sa iya nga hisa ang nagtulod sa biktima nga siya ang plano nga pagapatyon. Suno pa diri nga ang mga kaupdanan nila ang makapahayag kun ano siya nga klase sang tawo bilang kaupod sa trabaho.
Emosyonal man ini nga nagpangayo sang pasaylo sa pamilya sang biktima bangud indi sini intensyun nga utason ang kabuhi sang iya upod. Sa subong yara na nakahunong sa lock up cell sang Roxas City PNP ang suspek matapos nga boluntaryo nga ginsumiter ang kaugalingon sa mga kapulisan sa bulig sang tag-iya sang gina-obrahan nga furniture shop. Narekober sang mga kapulisan ang isa ka bara de kabra,12-gauge shotgun,isa ka empty shell kag tatlo ka wala makalupok nga bala.
