Davao City – Paspas nga gilamoy sa dakong kalayo pasado alas 7:00 sa gabie ang 15 ka mga classrooms sa F. Bustamante Central Elementary School nga bag-ohay pa unta nga nahuman og rehab karong tuiga.
Anaa sa 15 ka mga classrooms ang nangasunog lakip niini ang principal’s room diin nahimutang ang tanang karaan ug mga bag-ong rekords gikan sa grade 1 to 6, Numeracy room, City Library, SPED room, Property Custodian room ug mga classroom sa Grade 1, 2 ug 3.
Sumala sa sekyu sa maong tunghaan nga si Edito Tagbilaran nakita niini nga gabaga na ang ALS classroom ni Ramon Sison ug dali kining nikuyanap sa lain pang mga tapad nga mga kwarto.
Segun ni Janice Ilaguiso, Principal II sa maong tunghaan, nga kapin kun kulang 600 ka mga estudyante ang na-displaced.
“Mag-emergency class gyod mi ani wala miy option lain kay dili pod sila pwedi i-house sa gym kay basically wala naman pod silay mga bangko. Mag declare na pod mi nga no records found ani human nga naugdaw na gyod tanang mga records,” sumala ni Ilaguison.
Matud ni Ilaguiso gi-ayo ang maong mga gambalay niadtong nakalabay’ng tuig.
“Kining Gabaldon building gina-preserved gyod ni siya every 2 years gina-rehab ni kay dili gyod ni bungkagon kay part ni siya sa heritage sa DepEd,” matud sa prinsipal.
Dugang niini dili pa nila ma-estimate kung pila usab ang kantidad sa mga kagamitan sulod sa mga classrooms nga naapil usab og kasunog.
Sa pikas bahin sumala ni FO3 Aries Ballarta imbestigador sa Panacan Fire Station nga electrical short circuit ang posibleng hinungdan sa sunog.
Nakontrola ang sunog bandang alas 8:17 sa gabie ug gideklara kining fireout pasado alas 9:00 na sa gabie.
RadyoMaN Aimee Guinita
