Davao City – Ginamonitor sa Department of Social Welfare and Development (DSWD) ang mga kabataan nga nahilakip sa Pantawid Pamilyang Pilipino Program (4Ps) sa gobyerno.
Sa pakighinabi sa DXDC RMN Davao kang Gil Cauilan Jr., Project Development Officer (PDO) 1 – Grievance Division Unit sa DSWD-XI, gibutyag niini nga sa cash grant alang sa edukasyon aduna usay criteria nga ginapatuman sama sa pag-maintain sa mga bata og 85% nga attendance sa usa ka bulan nga pagtungha.
“Kining 85% (attendance) sa isa ka bulan sa pag eskwela nila, naa ni sa 22 diyas. Mura’g naa ra ni sa two or three absences ni sila nga allowed. Mulampas na na diha nga absences, mahimo na silang non-compliant diri sa among data base. Kung ma non-compliant na, automatic dili sila makadawat ana nga bulan,” saysay ni Cauilan.
Gipasabot ni Cauilan nga disiplina kini sa mga benepisyaryo aron kinahanglang maningkamot ang estudyante bisan sa aspeto sa pagsulod diha sa eskwelahan.
Giklaro sa opisyal nga sayud na niini ang mga benepisyaryo rason nga responsibilidad usab sa nahisgutan ang pagdasig sa ilang mga anak nga magtinarong sa ilang pagtuon.
RadyoMaN Kirby Manzon
