Davao City – Gipaniguro sa Department of Social Welfare and Development (DSWD) nga mi-agi sa saktong proseso ang pagpili sa mga benepisyaryo sa Pantawid Pamilyang Pilipino Program (4Ps).
Sa pakighinabi sa DXDC RMN Davao kang Merlinda A. Paragamac, Promotive Services Division Chief sa DSWD-XI, gibutyag niini nga wala gi-agi sa aplikasyon ang pagkahimuong miyembro sa 4Ps inay ang DSWD mismo ang mangunay sa pag-assess sa matag panimalay sa pagsuta kung kwalipikado kining maapil sa programa.
“Kami gyud ang niadto sa balay balay sa kada area, tibuok region eleven. And this is also implemented, mao pud nay standard process gyud nationwide sa atong implementation,” saysay ni Paragamac.
Gibutyag ni Paragamac nga walay pabor pabor ang pagpili sa 4Ps beneficiaries. Gani wala gitugot ang pag recommend sa usa ka pulitiko o kaha opisyales sa lokalidad aron lamang mahilakip ang usa ka pamilya sa nahisgutang programa.
“Walay recommendation nga gikan sa pulitiko, gikan sa department head sa usa ka LGU. Walay ingon ana. Nag start gyud ang maong pag-identify sa house to house nga assessment,” matud ni Paragamac.
Samtang giklaro sa opisyal nga ugaling wala ang pamilya atol sa gihimong house to house assessment, mamahimo kining mu-adto sa DSWD office aron ma-interview o ginatawag nga on-demand application.
RadyoMaN Kirby Manzon
