TACLOBAN CITY – Waray pa makakarawat hin cash grant an mga 4P’s beneficiaries nga mayada cash card tikang ha Philippine Veterans Bank.
Basi man gud ha nauna nga pahayag ni DSWD Regional Director Restituto Macuto, dida han Pebrero 5, 2018 masusudlan an mga cash card han mga beneficiaries pero matapos an pira ka adlaw in waray la gihapon sulod an mga ini.
Sumala kan Michelle Calzado, DSWD Social Marketing Officer for 4P’s, waray pa makagtuman an Philippine Veterans Bank ha pag pay-out ha mga benipesyaryo.
Ha pagka-yana in padayon an pag follow up han DSWD ha mao nga bangko agud mapadali na an pag-pay out ha mga benepisyaryo.
Bumulig na liwat an DSWD National Office ha pakipagsumpayan ha Philippine Veterans Bank ngan nag lalaum nga mapadali na an proseso.
An iba nga natagan na hin cash card tikang ha Phil. Veterans bBank sugad ha mga 4P’s han syudad han Tacloban, bungto han Palo ngan Tanauan in nahulogan na han kanan Abril tubtob Hulyo nga grant.
Ha iba nga lugar nga mayada na cash card ngan over the counter in waray la gihapon progress development hini.
Pinaagi man gud han Veterans Bank in tanan nga beneficiaries ha probinsya han Leyte in matatagan hin cash card ngan waray na an sinisiring nga over the counter ha munisipyo.
Ginhahangyo naman han DSWD nga mag-angan-angan la anay an mga 4p’s beneficiaries ilabi na an taga probinsya han Samar, Biliran ngan iba pa nga parte han Eastern Visayas kun diin padayon pa an pagbiling han DSWD hin bangko nga pwede magin partner ha pag pay-out han kwarta.
