Davao City – Gi-angkon karon sa Department of Social Welfare and Development (DSWD) nga adunay pagkalangay sa pag-release sa budget sa Pantawid Pamilyang Pilipino Program (4Ps) ngadto sa mga benepisyaryo niini.
Sa pakighinabi sa DXDC RMN Davao kang Florame Espada, Information Officer sa DSWD-XI, gibutyag niini nga kini tungod sa pagproseso sa mga ATM sa mga benepisyaryo kung asa didto na otomatik nga ihulog ang ilang budget.
“Tinuod gyud pud na nga naa gyoy delay because last year man gud nag start man gud ta og change sa atong mode of payment, gibuhat natong ATM na tanan. Ang nahitabo na atrasado gyud ang atong pag release sa ilang cash grant,” saysay ni Espada.
Gikumpirma ni Espada nga karong semanaha og sa sunod semana, madawat na ang 4Ps budget sa Enero ug Pebrero alang karon nga tuig. Aduna usay nakadawat niadtong bulan sa Mayo nga budget sa nakalabay pa nga tuig.
Gipasabot sa Information Officer nga dili dungan nga nadawat ang mga ATM tungod kay adunay dugay nakapasa og requirements alang niini. Hinuon, gipasalig sa DSWD nga mabawi ang mga delay labi na nga otomatik na nga musulod ang budget sa ATM sa mga benipisyaryo.
RadyoMaN Kirby Manzon
