Davao City – Gipaniguro sa Department of Social Welfare and Development (DSWD) nga on time na ang pag release sa budget sa mga benepisyaryo sa Pantawid Pamilyang Pilipino Program (4Ps).
Sa pakighinabi sa DXDC RMN Davao kang Merlinda A. Paragamac, Promotive Services Division Chief sa DSWD-XI, gibutyag niini nga updated na ang pag release sa budget ug otomatik na usab kining musulod sa cash cards sa mga benepisyaryo.
“Sa karon update na ta sa cash grant kay ginasulod na na sa ilang mga cash cards. Mag notify nalang mi, magpahibalo sa ilaha nga naa nay sulod ilang cash cards. Mao na nga managan na dayon na sila sa nagkadaiyang ATM,” saysay ni Paragamac.
Gi-angkon ni Paragamac nga adunay pagkadelatar sa pag release sa budget sa milabay nga tuig tungod sa proseso sa mga cash cards nga mao na ang ginagamit karon sa mga benepisyaryo sa mas dali nga releasing.
“Last year, naa tay mga delays because of the processing nato sa cash cards kay this is millions nga himuan og cash cards sa atong Land Bank,” segun ni Paragamac.
Nasayran nga gi-desenyo ang 4Ps sa pagtabang sa gikonsiderang “poorest of the poor” sa nasud subay sa mismong assessment sa DSWD.
RadyoMaN Kirby Manzon
