Davao City – Usa ang Barangay Tomas Monteverde sa 182 ka barangay sa Davao City nga dunay daghang pamilya nga igo-igo ra og panginabuhi apan nagbaton og daghang anak.
Sa datos, kapin usa ka gatos ka pamilya sa Barangay Monteverde nga naglisod natabangan sa Pantawid Pamilyang Pilipino Program (4Ps) sa nasudnong gobyerno.
Suma ni Barangay Health Worker (BHW) Head Carlito Navarro, dakong ayuda ang 4Ps sa pagpagaan sa kalisod sa mga pamilya nga walay kapasidad sa pagbuhi ug pagpatungha sa ilang mga anak tungod sa kagamay sa income.
Ubos sa 4Ps program, ang ginikanan makadawat og 500 ka pesos ug 900 ka pesos sa tulo ka anak (P300 matag usa) kun 1,400 ka pesos nga allowance matag bulan.
Apan ang mao nga kantidad dili pupaigo sa matag bulan nga panginahanglanon sa kadtong mga pamilya nga nagkamang sa kalisod apan kung isipon dako na kining tabang alang sa mga kabos.
Kumento ni Navarro nga dili tanang kabos ang nakapahimulos sa 4Ps sanglit sa ilang barangay lang daghan sa mga pobre nga tabangunon nga takos unta mabatangan sa programa apan wala maapil sa Pantawid.
Nagtoo kini nga adunay anomaliya sa programa kay base sa istorya sa ubang barangay nga ginakaltas matud pa ang allowance sa mga benepisaryo nga mu-absent sa panagpulong.
Busa pangutana nila asa kaha napadong ug si kinsa kaha nakasapi sa gikibhang nga kantidad?
Dili pabor si Barangay Tomas Monteverde Health Workers Head Carlito Navarro nga i-suspende ang 4Ps apan sugyot niini mao nga rebyuhon lamang ang programa aron masuta kun nadapat ba sa mga kabos o wala ang Pantawid.
RadyoMaN Joel Viray
