General Santos City—patay nang nakaplagan ang 5 anyos nga batang babaye kansa gituohang gilugos sa usa ka suspetsado sa may Crossing Palkan, Polomolok, South Cotabato.
Ang biktima itago lang sa pangalang alias Trisha , residenti sa samang barangay.
Alas 7:00 ang takna sa kagabie natulog ang biktima uban sa iyang 15 anyos nga magulang sulod sa ilang panimalay.
Alas 11:00 sa gabie dihang nakurat ang magulang sa bata dihang wala na ang iyang manghod sa iyang tapad. Iyang gipangita sulod ug gawas sa ilang panimalay apan wala niya nakaplagan hinungdan nga siya nangayog tabang sa mga Barangay Tanod sa ilang Lugar.
Ala 1:00 kaganinang kabuntagon dihang nakaplagan sa mga tanod ang patayng lawas sa bata sa tunga sa pinyahan 150 metros ang gilayuon gikan sa ilang panimalay.
Dunay 11 ka mga samad dinunggaban sa iyang tiyan ug dunay mga timailhan nga kini gihilabtan.
Sa follow-up operation sa kapulisan, gidakop ang suspek nga si Benjamin Balasabas Jr., 29, residenti sa samang Barangay human nakit-an ang mga asik sa dugo sa iyang bitbit nga sundang ug nagkadugo usab ang iyang sapot.
Si Police Senior Inspector Hernan Gabat, Deputy Chief Of Police sa Polomolok PNP nagkanayon nga posibling gisulod sa suspek ang biktima sa ilang panimalay ug giasnat padulong sa lugar nga nahitabuan sa krimen ug didto gipatay.
Hugtanon usab nga gihimakak sa suspek ang aligasyon nga siya ang responsabli sa krimen apan ang kapulisan kusog ang pagduda nga siya maoy suspetsado.
Igo nalang usab sa paghilak ang inahan sa biktima human nga nakit-an ang brutal nga pagpatay sa iyang anak. Sumala pa nga wala gyud nakatilaw ug bisan kusi lang ang iyang anak tungod pinangga niya kini pag-ayo. Nasayran nga wala ang inahan dihang nahitabo ang insidenti gumikan night shift kini sa Dole Philippines.
Si Balasabas ang balhog na sa silda sa Polomolok PNP samtang gikatakdang ipailawom sa Post Mortem ang patayng lawas sa 5 anyos aron makumperma kung kini ba gilugos ayha gipatay.
