Aurora,Zamboanga del Sur – Kasamtangan pa nga nagpahigayon og hot pursuit operation ang kapulisan sa Aurora Municipal Police Station ngadto sa usa ka suspetsado nga mi-ikyas human kini nakabangga sa 5 anyos nga batang babaye nga nailang si Jennifer Nunez Fortuna estudyante sa preschool ug lumulupyo sa Purok Lover’s lane Barangay San Jose, Aurora, Zamboanga del Sur.
Nahitabo ang nasangpit nga insidente kagahapon sa may alas 12:50 sa hapon sa mao nga lugar. Gilayon nga gisusi sa otoridad pinanguluhan ni SPO1 Ronald G. Enriquez ang insidente human makadawat og taho pinaagi sa cellphone sa may alas 12:52 sa hapon gikan sa nagpakabana nga indibidwal nga adunay naligsan sa maong dapit.
Base sa inisyal nga imbistigasyon sa kapulisan, naglingkod matud pa ang maong bata sa gawas sa ilang balay sa may alas 12:50 sa hapon apan kalit kini nga nilabang sa kalsada hinungdan nga naligsan kini sa usa ka pick- up truck, kolor puti nga nagtangag sa plaka numero nga SKD 166.
Nakaangkon ug daghang bun-og sa nagkadaiyanng parte sa kalawasn ang maong bata hinungdan nga gidali gilayon kini pagdala ngadto sa Aurora Community Emergency Hospital sa Barangay Cabilinan sa maong lungsod apan gideklara kini sa attending physician nga dead on arrival.
Human sa mao nga panghitabo nagdali nga misibat ang nagmaneho sa mao nga pick-up truck paingon ngadto sa Barangay Ezperanza, Ramon Magsaysay, Zamboanga del Sur.
