TACLOBAN CITY – Ginpamumusil han diri pa nakikilala nga mga suspek an usa nga singko anyos nga bata ngan iya nanay ha Brgy. Mahayag Matuguinao, Samar.
Basi ha report han Police Regional Office 8, ginkilala an duha nga biktima nga hi Johnric Belino. 5 anyos ngan an iya nanay nga hi Hazel Belino, aada na ha sakto nga pangidaron nga pareho nga residente han mao nga lugar.
Basi ha inisyal nga imbistigasyon, ginbabana-bana nga 10 nga armado nga mga kalalakin-an an nagpamumusil ha mga biktima rason han pagkaigo han bata ha tuo nga parte han iya ulo.
Sumulod an mga kalalakin-an ha sulod han panimalay han mga biktima ngan ginbiling hi Danilo Belino asawa han biktima.
Dida han waray makita han mga suspek hi Danilo, dayon hira nga kumalagiw ha lugar.
Dayon naman nga gindara an samaran nga bata ha Gandara District Hospital ngan ginbalhin ha EVRMC.
Samtang, nagpapadayon an imbistigayon han mga kapulisan ha pagkakakilanlan han mga suspek nga nagpapaluyo han insidente.
