ZAMBOANGA CITY—Sinco maga detenido del un estacion de pulisiya ya man talabangan bobotia hasta ya muri el otro detenido mientras adentro del carcel del Martes madrogada.
Conel victima ya nombra como si Jose Rizalino Esperat Francisco, 55 anio de edad, casao y residente del Sitio Malandi, Patalon, na costa weste del ciudad.
El incidente ya sosede adentro del carcel del Labuan Police Station.
El dos maga duty pulis canda PO2 Daisy Mar Maningo y PO1 Abraham Allian, Jr., ya habla ya responde sila na celda despues ya oyi sila el trucusan ta sosede donde el sinco detenido ta man talabangan con Francisco.
Asegun conel pulis ya lleva dayun corre na hospital con Francisco pero ya despidi este amediante del curada medical despues este ya suffri monton contusion na cuerpo.
Con Francisco ya detene na carcel despues mismo su esposa ya reclama na pulis despues este ya man waras na diila residencia amediante bien buracho este.—Dan Toribio
