5 vintage bombs nakalutan sa Catalunan Grande

Davao City – Anaa na sa kustodiya sa Davao City Explosive Ordnance Disposal Unit (EOD) team ang lima (5) ka mga items sa eksplosibo nga nakalutan sa usa ka backhoe operator sa Sitio Awa, Catalunan Grande, Davao City niadtong aldaw’ng Miyerkules (Nobyembre 23, 2022).

Sa interbyu sa DXDC RMN Davao sa Talomo Police Station (PS), gibutyag nga human girespondehan sa ilang personahe ang report, nasuta nga usa ka unexploded ordnance o vintage bomb ang maong mga items nga gitaya na.

“Gitawag nila (ang Talomo PS) para i-verify (ang items). At the same niadto ang EOD team ug ang K9 Unit personnel. Lima ni kabuok nga items sa 75 mm projectile high explosives,” saysay sa pulis.

Kagahapon sa buntag, nakalutan usab ang usa ka general purpose bomb nga anaa sa 5 feet ug 8 inches ang gitas-on sa Purok 7-A, Silca, Matina Pangi ning syudad.

Panawagan ngadto sa publiko nga gilayong ireport sa awtoridad kung adunay makalutan o madiskobrehan nga eksplosibong butang aron kini gilayong maberipika ug marespondehan.

RadyoMaN Kirby Manzon