Tapaz, Capiz- Nag-angkon sang madamo nga kapilasan sa lawas ang 54-anyos nga mangunguma matapos ini ang ginluthang kag ginlabo sang makapila ka beses sa Barangay Agpalali sa banwa sang Tapaz.
Ginkilala ang biktima kay Lornalee Gallenero, residente sang nasambitan nga lugar nga nag-angkon sang madamo nga kapilasan sa lawas nga gintunaan sang insigida sini nga kamatayon.
Nagaguha sa imbestigasyon sang mga kapulisan sa banwa sang Tapaz nga gulpi na lamang nga gin sulod sang suspek nga si Ariel Olog, 23-anyos ang biktima kag ini ang ginluthang gamit ang 12-gauge shotgun.
Ginpalapitan pa ang duguon nga biktima sang mga kaupdanan sang suspek kag ini ang ginlabo sang makapila ka beses.
Ang pagtimalos amo ang ginasunod nga motibo sang mga kapulisan sa natabo nga krimen.
Mahibaluan nga ang suspek nga si Ariel Olog amo ang anak sang nasapwan nga patay nga ginlubong sa duta nga mangunguma sa Sitio Malansa Brgy Abangay Tapaz sang nagligad nga semana.
