56 a mannalon, nagturpos iti FBS

62

iFM Laoag – Inrakurak ni Provincial Agrarian Reform Program Officer II (PARPO II) Vic M. Ines a limapulo ket innem a mannalon ti nagturpos itay kallabes iti Farm Business School (FBS) ti Department of Agrarian Reform – Ilocos Norte.

Duaapulo ket siyam kadagiti nagturpos ket agrarian reform beneficiaries (ARBs) manipud iti Capacuan Multipurpose Cooperative (MPC) ti Batac City. Dagiti dadduma pay a nagturpos ket ARBs a kamkameng ti Bugnay Development Cooperative ti ili ti San Nicolas.


Kuna ni PARPO II Ines, babaen iti FBS, nasursuruan dagiti mannalon nga agbalin nga entrepreneurs tapno lalo pay a dumakkel dagiti mapastrekda.

Iti uneg ti duaapulo ket lima a session, naisuro kadagiti ARBs dagiti nasisita nga aspeto ti bookkeeping, cash flows, market surveys, labor, product selling, product costing ken packaging.

Inpanamnama met dagiti nagturpos nga usarenda dagiti naadalda iti FBS tapno kanayun a dakkel ti masapulanda babaen kadagiti daga nga inpaima kadakuada ti Comprehensive Agrarian Reform Program. [Detalye manipud ken ni Jorge Richard P. Guerrero]

Bernard Ver, RMN News

Facebook Comments

From Advertisers