58 ka mga TESDA Accredited Driving Schools sa Region 12 ipasulod sa listahan sang LTO.

Ginapreparar na sang Technical Education and Skills Development Authority 12 ang listahan sang mga eskwelahan sa rehiyon nga may-yara sang Driving NC II registered program agud mahatagan sang accreditation sang Land Transportation Office 12.
Ini matapos nga pirmahan ni TESDA Director General Secretary Isidro S. Lapeña ang Memorandum of Agreement sang TESDA kag LTO.
Ang nasambit nga Memorandum of Agreement ang mangin basehan sang TESDA kag LTO sa pagpabakod sa paghanas para sa mga driver sa rehiyon kag agud malikawan ang disgrasya sa dalanon.
Suno kay TESDA 12 Regional Director Rafael Y. Abrogar II nga madugay na ang Driving NC II sang TESDA kag halos tanan nga eskwelahan sa rehiyon ang nakahanda para sa mga training angot sa driving.
Pahayag ni Abrogar nga kon ang LTO ang may 15 ka oras nga training sa driving ang TESDA naman ang may-yara sang 15 ka adlaw nga driving amo nga mapaayo pa ang ihibalo sang mga drivers sa rehiyon.
Plano naman sa subong sang LTO 12 sa pagpanguna ni Director Macario D. Gonzaga nga dasigon ang pagproseso sang mga dokumento agud nga makaumpisa na sa nasambit nga kasugtanan.
Samtang prayoridad naman suno pa ang mga Indigenous People nga ipaidalom sa training angot sa pagmaneho.
Nabalhag man sa MOA nga pwede nga gamiton ang Driving NC II sa pagkuha sang lisensya kag ang mga National Certificate lang ang batunon sang LTO.
Ang TESDA Driving NC II ang katumbas suno pa sang Practical Driving Course (PDC) nga may restriction code 2 para sa mga Non-Professional Driver’s License, ang TESDA Driving NC III naman ang katumbas sang Professional Driver’s License kag dugang nga restriction code 3/8 sa mga driver’s license.
Ginalauman nga paagi sa Memorandum of Agreement mapalapad ang ihibalo sang mga drivers sa rehiyon.

Facebook Comments