5th Davao City Torotot Fest mahinayon

Davao City – Mas engrande ug mas lingaw ang subling pagpahigayon sa Davao City Torotot Fest karong tuiga.

Kini ang gipaniguro ni Beethoven ‘Ben’ Sur, corporate affairs manager sa Phoenix Petroleum Philippines Inc. kinsa ang sponsor sa maong event ning tuiga, nga mas dako ang premyo ingon man hugyaw ang mga aktibidad sa subling pagbalik sa maong kapistahan.

Saysay niini makadawat og P50,000 ang first prize, P20,000 sa second prize ug P10,000 sa third price samtang gitino niini nga walay special prizes apan adunay upat ka entries kinsa makadawat og P5,000 matag usa isip consolation prizes.


Matud niini nga gilangkuban ang maong selebrasyon sa managlahing kompetisyon sama sa Giant Torotot Competition, Torotot Costume inspired Competition, ug Torotot Group Dance Competition diin ipangdeklara ang mga mananaog pipila ka oras una mag Enero 1, 2019.

Dugang niini nga alas-4:00 sa hapon sa Disyembre 20, 2018 mahuman ang registration sa mga gusto muapil diin walay kinahanglan bayaran ug abli kini alang sa tanang membro sa mga barangay dinhi sa dakbayan.

Gitataw ni Sur nga tumong sa pagbalik sa maong event mao ang pag-awhag sa Davao ngadto sa uban pang syudad sa nasud nga mamahimong makaselebrar sa pag sugat sa bag-ong tuig sa lingaw nga pamaagi bisan walay presensya sa firecrackers.

Kahinumdoman nga wala mahinayon ang Torotot Fest ingon man wala napadayon ang nabiling mga aktibidad sa Pasko Fiesta sa milabay’ng tuig gumikan sa sunod-sunod nga trahedyang nahitabo sama sa paglampornas ni Bagyong Vinta diin liboan ang naapektuhan lakip ang unom ka mga rehiyon sa Mindanao ug ang pagkasunog sa NCCC Mall Davao diin 38 ang deklaradong patay.

RadyoMaN Jason Amisola

Facebook Comments