Davao City – Nagtoo ang gobernador sa lalawigan sa Davao del Sur nga magpabiling dakung hagit sa administrasyong Duterte ang mga seryosong suliran sama sa padayong pagkuyanap sa COVID-19 pandemic.
Sa interview sa public affairs program nga ‘Straight to the Point,’ gibutyag ni Gov. Douglas Cagas nga alang kaniya, bisan pa’g kinsay presidente dili kaya undangon ang virus tungod sa kadaghan pang puwedeng mataptang lungsuranon ning makamatay nga klase sa balatian.
Dugang ni Cagas, subo hunahunaong dili makatagbaw ang ayuda nga gihatag sa gobyerno pananglitan ang kontrobersiyal kaayong Social Amelioration Program (SAP) nga kausa ra gihatag ngadto sa mga identified beneficiaries luyo sa kamatooran nga kulang pa kaayo ang maong hinabang alang sa padayong panginahanglanon sa katawhan taliwala ning maong health crisis.
Bisan pa man niini, malaumon gihapon si Cagas nga makadungog kini og maayong mensahe atol sa ika-limang hugna sa ‘State of the Nation Address’ kun SONA ni Pres. Rodrigo Duterte karong adlawa.
Partikular nga gusto madungog sa gobernador mao ang mga planong buhaton ni Duterte sa sunod nga mga bulan alang sa pagpabarug pagbalik sa nasudnong ekonomiya, pagtubag sa panginahanglanon sa katawhan maingon man ang malagmit epekto diha sa dagan sa pulitika dinhi sa nasud sa wala pay alibyong balatian nga nikunsad sa entero kalibutan.
RadyoMaN Joel Viray
