Davao City – Gisaysay karong buntag sa uyuan sa biktimang 6 anyos nga si alyas Jane kinsa gipatay sa Matina Pangi ning syudad og giunsa nila pagkabalo ang maong balita.
Sa ekslusibong pakighinabi sa DXDC RMN Davao kang Tulibas, uyuan sa biktima nga giingnan sila nga adunay batang nakaplagan sa sagbutan dapit sa ilang lugar, dali-dali usab gisuta sa mga ginikanan og didto nakumpirma nga ang na-missing nga ilang anak ang nakaplagang patay na.
Gibutyag karon sa uyuan nga matud pa sa mga ginikanan buot nila ipa-cremate ang patayng lawas ug ilubong human sa tulo ka adlaw tungod dili na maitsura ang nawng sa bata.
Kahinumduman nga gikatahong na-missing ang bata niadtong Setyembre 17 karong tuiga ug sa susamang adlaw, nakita usab sa saksi ang suspek nga si Rico Jay Labao nga puno og sagbot ug basa na ang sapot niini ug nagtuo kini nga gikan ang suspek sa direksyon sa nahimutangan sa patayng lawas sa bata.
Sa karon, gikatakdang ipailawum sa otopsiya ang biktima aron masuta og nahilabtan ba kini samtang ang suspek balhug na karon sa Talomo PNP.
RadyoMaN Renz Barbarona
