6 anyos nga batang lalake nga na-rescue, posibleng gi-maltrato

Gi-rekomendar ni City Social Welfare and Development Officer Gina Autida nga mahiling sa mga doktor sa Southern Philippines Medical Center ang 6 anyos nga anak ni Rhiza Baculio kansang bag-ohay lang na-rescue tungod sa mga nakitang mga bun-og sa kalawasan.

Gipa-blotter sa inahan sa Talomo PNP ang nadiskubrehang mga bun-og ingun man samad sa likod ug tiyan nga bahin sa menor de edad.

Gisaysay ni Edelito Surigao, head sa Lupong Tagapamayapa sa Barangay Talomo nga wala niya mapugngi iyang mga luha nga nagsud-ong sa bata ingun man nga daw murag adunay gikahadlokan sa iyang gidangatan.

Nakatakda karong adlawa nga ipahiling sa inahan sa SPMC ang bata aron masuta ang medical nga kondisyon sa menor de edad lakip ang pagkumpirmar nga biktima kini sa pagmaltrato ingun man patubagon ang mga responsabli.

Kahinumduman nga na rescue sa DXDC public service team, CSSDO Talomo District ug mga opisyal sa Barangay Talomo sa pagpanguna ni Kapitan Bendor Calamba ang menor de edad sulod mismo sa balay sa amahan nga si Darwin Mosqueda sa Bangkal, ning syudad sa Dabaw.

RadyoMaN Erin Lumosbog