6 ka Dabawenyos nga Datu Bago Awardees 2026, ginganlan na

Davao City – Ginganlan na ang unom ka Dabawenyo nga makadawat sa 2026 Datu Bago Awards, ang pinakataas nga pasidungog nga ginahatag sa mga indibidwal nga adunay dakong kontribusyon sa kalamboan ug pagpreserbar sa kultural nga panulondon sa Dakbayan sa Davao.

Sumala sa Datu Bago Awardees Organization, Inc., ang mga napiling awardees karong tuiga mao sila: Eduardo A. Bangayan alang sa kategoryang Public Service, Gene Cheon Bangayan sa Tourism, Maria Cristina Floirendo Brias sa Community Livelihood, Alex Valdez Buenaventura sa Rural Banking, Manuel Mendoza Orig sa Civic Service, ug Welehito Noyna Pepito sa Visual Arts.

Matud ni Pilar C. Braga, chairperson sa Datu Bago Awardees Organization, Inc., ang Datu Bago Awards nagpasidungog sa mga indibidwal nga adunay talagsaong kontribusyon sa pag-uswag sa Davao City ug nagpadayon nga inspirasyon sa mga Dabawenyo pinaagi sa ilang dedikasyon sa serbisyo ug kaayohan sa komunidad.

Ipahigayon ang seremonya sa paghatag og pasidungog sa Marso 18, 2026, alas-5:00 sa hapon, sa The Royal Mandaya Hotel, subay sa pagsaulog sa 89th Araw ng Dabaw.

Kahibaluan nga ang Datu Bago Awards gitukod niadtong 1969 ug ginganlan sa lokal nga bayani nga si Datu Bago.

RadyoMaN Kareen Beltran