Davao City – Mas maayo nga ma-establisar una og unsa nga mga resources ang bahinon sa Pilipinas ug China dinha sa exploration sa mga bahandi ilawom sa kadagatan sa West Philippine Sea.
Sa pakighinabi kang Ateneo de Davao University (ADDU) Political Science and History Professor Ramon Beleno III, gitataw niini nga dili pa maingon sa karon ang angay nga pagmaya sa mga Pinoy human nga misugot na matud pa ang China sa 60/40 nga bahinay.
Una niini, gi-almahan sa pipila ka mga eksperto sa kaulohan ang nasangpit nga planong pagbahinay diin matud pa nga kinahanglan dili iatras ang soberanya sa Pilipinas ilabi na nga kini nahukman na sa UN Tribunal pinaagi sa United Nations Convention on the Law of the Sea nga kita maoy nagbaton sa ‘exclusive sovereign rights’ sa maong parte sa Dagat-Pasipiko apan dugang ni Beleno nga sa karon dili gayud maayong paminawun ang 60/40 apan aron dili usab magkagubot, pahimuslan og unsa man ang makuha niini ug magtinabangay nalang ang duha ka nasud sa pagprotekta sa mga bahandi sa kadagatan.
Subay kini sa giingon ni Foreign Affairs Secretary Alan Peter Cayetano nga mipadayag og pagtugot ang China nga magpahigayon og 60-40 joint exploration sa natural resources sa gikabangian kaayo nga kadagatan diin matud pa 60 porseinto niini ang mapadulong sa Pilipinas samtang ang 40 porsiento igahin ngadto sa China.
Sa karon, gilauman nga karong bulana o sa bulan sa Setyembre magbayluay og drafts sa maong kasabotan ang duha ka mga nasangpit nga nasud aron nga mapahiluna ang mga bahandi ilawom sa West Philippine Sea.
RadyoMaN Renz Barbarona
