Sa interview sa DXDC RMN Davao kang Police Major Al Anthony Gumban, Officer-In-Charge sa Mati City PS, iyang giila ang biktima nga si Nilda Boyose, 63 anyos.
Sa report, gikan naninda ang biktima sa Madang Public Market ug sa dihang panaug na siya sa tricycle atubangan sa iyang balay, kalit lamang nga gilabni ang iyang bag nga dunay sulod nga P50,000 sa duha ka lalaki (riding-in-tandem). Wala pa nakuntento, ayha misibat ang mga suspek, gipusil ang tiil sa biktima nga naigo sa iyang tuong batiis, nga dali usab nga gidala sa ospital.
Padayon karong giimbestigahan sa otoridad ang insidente ug ginasubay ang closed-circuit television (CCTV) cameras sa lugar nga makatabang aron maila ang mga responsable sa krimen.
“Magbinantayon gyud sila kanunay, mahimong security conscious ilabina kanang weekend nga dili sila maka-deposit sa proceeds sa ilang mga kinitaan sa ilang tindahan, sa ilang business,” pahimango sa police official.
RadyoMaN Kirby Manzon
