Davao city –Gibuksan na ang 6th ASEAN Scout Jamboree nga gilusad sa Energy Park, Barangay Apokon, Tagum City, Davao Del Norte karong adlawa.
Gipangunahan sa National President Boy Scout of the Philippines nga si Atty.Wendell Avisado ang opisyal nga pag-abli sa lima ka adlaw nga ASEAN Jamboree gikan Nobyembre 27 hangtud sa Disyembre 2.
Gisugdan ang kalihukan pinaagi sa Grand Parade tuyok sa Arena sa venue alas 2:00 sa hapon ug pasado alas 3:00 gihimo ang pormal nga opening ceremony sa Jamboree.
Sumala ni Dante Simangan, Jamboree Coordinator nga muabot sa kapin 29 mil ka delegado ang miapil sa Jamboree diin ang 20 mil gikan sa Pilipinas.
Samtang nwebe mil gikan sa napulo nga nasud nga sakop sa ASEAN ug laing napulo ang guest countries.
Sumala ni Doming Lopez, Council Scout Executive sa Davao City Boy Scout Council nga sa 11 mil ka delegado sa tibuok Mindanao ang Davao City Contingent ang pinakadaghan human miabot og kapin tres mil ka delegasyon.
Segun ni Lopez nga napilian ang Tagum City nga maoy lunsaran sa 6th ASEAN Jamboree tungod sa kadako sa venue kung asa napahigayon ang National Jamboree niadtong tuig 2015.
Samtang hugot gipatuman sa mga otoridad ang istrikto nga seguridad sa tibuok syudad sa Tagum ilabi na sa Energy Park kung asa gilusad ang 6th ASEAN Jamboree.
RadyoMan Joel Viray
