7 ka mga lungsod sa Zamboanga Del Norte, recipient sa DOH Red Orchid Awards, Labason Red Orchid Hall Of Fame Awardee

9

Ang Department of Health (DOH) Region 9 , mipasidungog og DOH Red Orchid Awards sa pito ka mga lungsod sa lalawigan sa Zamboanga del Norte , didto napahigayon sa LM Metro Hotel dakbayan sa Zamboanga , bag-ohay pa lamang.

Kini nga impormasyon nasayran atol sa Media Forum sa DOH kagahapon sa buntag Disyembre 06, didto sa Mibang Hotel ning dakbayan sa Dipolog.

Sumala pa ni Ms. Virgie Galareta , Health Education and Promotion Officer sa DOH Region IX , adunay pito ka mga lungsod dinhi sa probinsya ang gipasidunggan og Red Orchid Awards sa DOH.

Ang mga awardees mao ang mga lungsod sa Salug , Manukan , Katipunan , Dapitan , Piñan , Sibutad ug ang lungsod sa Labason nga naangkon ang Hall of Fame sa Red Orchid Awards.

Matud pa ni Ms. Galareta , naangkon sa lungsod sa Labason ang Hall of Fame , human nakadaug na usab kini sa maong awards , for 3rd consecutive years nahimung awardee sa Red Orchid Awards nga diin ilang namaintain ang 100 % smoke free environment ug sa pagsanong sa World Health Organizations “MPOWER” Framework.

Si Labason Mayor Eddie Quimbo , dili matukib ang kalipay gumikan sa sunod sunod nga mga pasidungog ang naangkon sa lungsod sa Labason ilawom sa iyang pagdumala, gipasalamatan usab niini ang kagamhanang probinsyal ilawom sa adminstrasyon ni Gov. Uy sa suporta niini sa mga programa ug kalihokan sa LGU Labason.

Gipahalipayan usab ni Mayor Quimbo ang mga empleyado sa nagkalain laing ahensya sa labason sa ilang walay puas nga suporta og tabang aron maangkon ang nasangpit nga mga pasidungog diin nahimung Hall of Famer sa red Orchid Awards ang labason ug naangkon na usab niini ang Seal of Good Local Governance.

Nasayran nga ang Red Orchid Awards sa DOH , paghatag og pasindugog ug pag-ila ngadto sa mga siyudad, lungsod , government agencies ug health facilities sa ilang istriktong pagpatuman sa tobacco control measures ug epektibong implementasyon sa 100 % smoke free environment.

Ang mga winners napili gumikan sa ilang hugtanong pagpaningkamot, kampanya aron sa pagpatuuman sa 100% tobacco-smoke free environment nga nagsunood sa World Health Organizations “MPOWER” Framework.

Gawas sa trophies ug Certificates nga ilang nadawat, ang Home of Famer nga lungsod sa Labason nakadawat kini og P 500, 000.00 project grant sa pagsustener sa ilang tobacco control activities.

Samtang ang Red Orchied Awardees nakadawat usab kini og P 100,000.00 kantidad sa mga tambal/medisina nga ilang magamit diha sa smoking cessation ug pagkontrol sa non-communicable diseases. (PIC-ZSM)

Facebook Comments