7 ka tawong usa ka semanang naglutaw-lutaw sa dagat nasalbar sa navy

Davao City — Kasamtangang nagpahigayon og sea trial sa bag-ong palit nga motorized bangka gikan sa Zamboanga paingon sa Tawi-Tawi, ang pito ka mga lalaki sa dihang nadisgrasya kini sa kadagatan.

Sa interbyu sa DXDC RMN Davao kang LT Nicheru Brien Claudio, Naval Forces Eastern Mindanao, Public Information Officer, nadaot ang bangka human kini maigo sa dakong kahoy.

Pito ka adlaw ang mga biktimang naglutaw-lutaw sa kadagatan ug nagpatabang kini aron ma-rescue.

Gimanduan ni Commodore Carlos Sabarre, NFEM ang mga personahe sa Maasim ug Balut Island nga mulusad og search and rescue operations aron masalbar ang mga biktima.

Niadtong Nobyembre 21, nagpahigayon na og aerial search operations sa kadagatan sa Sarangani Province ug positibong nakita ang nadaot nga bangka sa border sa Indonesia.

Nakig-alayon ang Navy sa MV Shinryo Maru, usa ka Japanese Bulk Carrier vessel nga nihawa sa Indonesia ug malampusong narescue ug gipasakay ang mga biktimang giilang sila Hamid Sahabat, Benhar S Idanny, Nisar Haiber, Jimmy Sakilan, Abdennasir Bandahala, Rolly Posadas ug Altaim Latip pulos mga taga-Zamboanga.



Matud ni Claudio, gilayong gitabangan ang mga biktima ug gipailawon sa medikal nga eksaminasyon una kini nibiyahe pabalik sa Zamboanga.

RadyoMaN Aimee Guinita

Facebook Comments