Sa interview sa DXDC RMN Davao kang Police Staff Sergeant Angelito Arce, imbestigador sa Monkayo Municipal Police Station (MPS), iyang giila ang suspect nga si Arnold Vargas 43, samtang ang biktima mao si Martin Cabahug 70, pulos residente sa nahisgutang lugar.
Gibutyag ni Arce nga yuta sa biktima ang gipuy-an ug ginaugmad sa supect sa pila na ka tuig, apan dili kini ang rason sa ilang bangi. Niadtong tungora, nag-inom ug hubog ang duha, ug panahon nga mahubog ang biktimang 70 anyos, nagasaka kini sa balay ug nagasulod sa kwarto sa maong balay, nga pirmi usab nila nga ginabadlong.
Apan niadtong higayona, adunay problema nga ginaatubang ang pamilya ug didto napungot na ang tag-iya sa balay sa dihang misaka napud ug nisulod sa kwarto ang biktima. Didto na mikuha ang suspect sa iyang improvised shotgun (bukakang) ug gipusil ang biktima nga naigo sa iyang dughan nga miresulta sa iyang hinanaling kamatayon.
“Kada mahubog daw kadtong victim, musulod og kwarto sa balay sa suspect. Unya naa man didto iyang asawa ug mga anak nga babae. Dugay nana nga ginahimo sa (victim) every time mahubog,” saysay sa imbestigador.
Sa pagkakaron, gibalhog na sa Monkayo MPS ang suspect nga mi-surrender usab niadtong Sabado sa buntag, November 4, 2023.
RadyoMaN Kirby Manzon
