Tadtad sang pilas sa lawas ang 70 anyos nga tigulang matapos ginlabu sang iya 73-anyos nga bayaw kaina sang hapon sa barangay Alibunan, Calinog, Iloilo.
Ginkilala ang biktima nga si Wilfredo Sululayon, 70 anyos, pumuluyo sang Sitio Dao, Barangay Alibunan, Calinog samtang ang suspek nga bayaw sini ginkilala nga si Eduardo Pinuela, 73 anyos sang amo man nga lugar.
Ginpahayag ni SPO4 Alexander Lauron, Deputy Chief of Police sang Calinog PNP nga mga alas 3 kaina sang hapon sang ginlabu ni Pinuela ang iya bayaw nga si Sululayon nga nakaagum sang madamo nga kapilasan sa nagkalain-lain nga bahin sang lawas.
Gindala sa Western Visayas Medical Center ang biktima samtang natigayon naman nga madakpan ang sus[ek kag yara karon sa custody sang Calinog PNP.
Suno kay Lauron nga ginalantaw nga motibo sang insidente amo ang madugay na nga hiligut-anon sang magbayaw angut sa gina-awayan nila nga tanum nga kawayan.
